SAIH fordømmer arrestasjonen av Promise Mkwananzi, leiar av Zinasu, og ni andre studentleiarar

Politiet i Bulawayo, Zimbabwe, arresterte onsdag 17. januar ti studentleiarar, blant dei Promise Mkwananzi, leiaren av Zinasu, og Beloved Chiweshe, generalsekretæren i Zinasu. Studentleiarane blei tekne til politistasjonen i Matopos, ein avsidesliggande stad 40 km utanfor Bulawayo.

Zinasu arbeider for tida med ein landsomfattande kampanje retta mot statleg innførte endringar som gjer tilgangen til utdanning svært vanskeleg for zimbabwarar. Vilkårleg heving av studieavgifter har blant anna ført til at yrkeshøgskulen i Bulawayo (Bulawayo Polytechnics) berre har eit gjennomsnitt på 5 studentar per klasse, og i Bulawayo har dessutan fleire kantiner blitt stengde fordi studentane ikkje ein gang har råd til å betale heile studieavgifta.

Det er planlagt at Promise saman med Zinasus koordinator Washington Katema skal vere i Noreg frå 14. til 28. februar. Dei kjem hit i samband med ISFiT, den internasjonale studentfestivalen i Trondheim, og medan dei er i Noreg skal dei også besøke nokre av SAIH sine lokallag.

SAIH fordømmer arrestasjonane, og vil følgje nøye med på utviklinga framover. Vi er uroa for dei arresterte sin situasjon, då det stadig blir meldt om vald og overgrep i samband med arrestasjonar av studentar i Zimbabwe, og vi håpar at dei har det bra. Dei arresterte studentleiarane gjer eit svært viktig arbeid for studentrettar og demokrati i Zimbabwe, og SAIH ser fram til å få besøk av Promise og Washington i februar. Vi ser særs alvorleg på situasjonen i Zimbabwe, og det er no endå viktigare enn før at studentleiarane sine stemmer blir høyrt også utanfor Zimbabwe.

Les Zinasus og SSTs pressemeldinger